SUID-KAAP NUUS - Vir die eerste keer in die geskiedenis van die Eden Sportraad (EDENSR) en sy voorgangers is daar ‘n portefeulje op die Uitvoerende Bestuur geskep om na die belange van alle deelnemende sportpersone, ingesluit atlete, spelers, swemmers, boksers, en dies meer, om te sien.
Sover vasgestel kan word, is EDENSR die eerste distriks sportraad wat ‘n atleteverteenwoordiger op die Uitvoerende Bestuur het.
Kittie Terblanche, SA Toutrekker, is tydens die onlangse AJV van EDENSR verkies en sy sal bygestaan word deur nog vier verteenwoordigers van ander sportkodes wat as die Atlete Kommissie sal fungeer.
Dit sal dan ook haar verantwoordelikheid wees om die belange van alle geaffilieerde deelnemende sportpersone te verteenwoordig en word hulle almal genooi om met haar in kontak te kom met hulle uitdagings. Van elkeen van die 50 geaffillieerde federasies word nou verwag om ‘n soorgelyke portfeulje op hulle bestuur te skep.
Hierdie Atlete Verteenwoordigers sal dan ten minste een keer per jaar bymekaar kom om sake van gemeenskaplike belang te bespreek.
Kittie, as voorsitter van die EDENSR se Atlete Kommissie, sal dan ook die EDENSR verteenwoordig op die WCPSC se Atlete Kommissie. Sy is tans ook die WK Toutrek se Atlete Verteenwoordiger vir Toutrek.
Kittie Terblanche, woonagtig op George, se sport agtergrond maak haar ideaal vir die portfeulje. Sy het as atleet reeds baie vermag, onder meer ook heelwat ondervinding in bestuursaangeleenthede:
2012 – George – Die Burger Sportvrou van die Jaar;
2013 – SA Toutrek Sportvrou van die Jaar;
2013 – Eden Toutrek Sportvrou van die Jaar;
2011-2016 – was deel van die SA Toutrekspanne (Binnehuis en Buite)
2010-2011 Sekretaris – Hartenbos Toutrekklub
2011- 2015 Sekretaris – Eden Toutrekklub
2012-2016 Sekretaris – George Toutrekklub
2011-2014 Sekretaris – Eden Damesport
2014- Huidig Tesourier – Weskaap Toutrekfederasie
2015-2106 SATF Atleteverteenwoordiger op TWIF
2016 Atleteverteenwoordiger – Weskaap Toutrekfederasie
2016 Atleteverteenwoordiger – Eden Sportraad
'Ons bring jou die nuutste Tuinroete, Klein Karoo, Hessequa nuus'
