MOSSELBAAI NUUS - Na die uiters welkome en deurdringende reën gedurende verlede week was die opgewondenheid onder juskeispelers uitermate groot om die seisoen vanjaar op Hartenbos op 'n hoë noot af te sluit.
Spelers van George, Riversdal en Hartenbos het deelgeneem aan die jaareind-toernooi, hoewel die aantal inskrywings gekortwiek is deur die feit dat die junior spelers tans eksamen skryf en sommige senior en ouer spelers familie verpligtinge gehad het, was die algemene gees goed en die mededinging taai en veeleisend.
Die A- en B-spanne, waarvan daar gesamentlik ses was, het teenmekaar meegeding.
In die C-afdeling was slegs vyf spanne wat mekaar die stryd aangesê het. Die B-afdeling het vir 'n paar verrassings gesorg. Twee spelers van Groot-Brakrivier, Sarel du Plessis en Fanie Londt en twee spelers van Hartenbos, Faan Gerber en Ewie Engelbrecht het kombineer.
Hulle het hul stemme behoorlik dik gemaak en die B-afdeling totaal oorheers. Aangesien hulle teen die A-spanne meegeding het moes hulle voldoende punte insamel om hul afdeling te wen. Dit het hulle met oortuiging reggekry.
In die C-afdeling moes Groot-Brakrivier ook 'n speler bydra wat Hartenbos C 'n gedugte span gemaak het.
Onder die bekwame leiding van Duimpie van Zyl as agtergooier en kaptein, het hulle die afdeling totaal oorheers.
Aangesien die A- en B-spanne teenmekaar meeding is dit belangrik dat die A-spanne goeie punte teen die B-spanne insamel ten einde hul kragmeting teenmekaar, gewoonlik die laaste wedstryde van die dag, met vertroue kan aanpak.
Die finale botsing tussen Hartenbos en Outeniqua was weer eens soos altyd in die verlede, die hoogtepunt.
Hartenbos se gesoute viertal van Willem Botha, Pieter Stander, Hennie Hanekom en Sydney Stopforth het hul meesterskap wel deeglik bewys en as oorwinnaars uit die stryd getree met die eindtelling 10½ - 4½ in Hartenbos se guns.
Uitslae:
Die finale uitslae is soos volg:
A-Afdeling: Hartenbos (57); Outeniqua (48½)
B-Afdeling: GBH (Groot-Brakrivier en Hartenbos) (37); Hartenbos B (28); Riversdal (28); George (26½).
C-Afdeling: Hartenbos (51½); Riversdal C2 (35½); Riversdal C1 (25); Outeniqua C1 (19); Outeniqua C2 (19).
Na die uiters geslaagde toernooi, is verskeie verdienstelike trofeë uitgeloof. Spanne is beloon vir getroue en volgehoue prestasies gedurende 2014-2015. Hier volg die eerste drie plekke van onderskeie afdelings:
Spanliga-uitslae 2014/2015
B-spanne: 1. Riversdal B (202); 2. Hartenbos B1 (197½); 3. George B1 (156).
C-spanne 1. Hartenbos C (162½); 2. George C1 (144½); 3. Riversdal C1 (119).
A-spanne: 1. Hartenbos A (173); 2. George A1 (141); 3. Outeniqua (76) .
B-spanne: 1. Riversdal B (125); 2. Hartenbos B1 (106); 3. George B (66½).
C-spanne: 1. Hartenbos C (191½); 2. Riversdal C2 (174); 3. Riversdal C1 (155).
A-spanne: 1. Hartenbos A1 (132½ ); 2. George A (131); 3. Hartenbos A2 (61)
B-spanne: 1. Hartenbos B1 (78); 2. George B1 (69½); 3. Riversdal B (48).
C-spanne: 1. Riversdal C3 (97½); 2. Riversdal C2 (84); 3. Riversdal C1 (82½).
'Ons bring jou die nuutste Mosselbaai, Tuinroete nuus'
