MOSSELBAAI NUUS - Met die sonnetjie wat saans vinnig sak, moes die 128 spelers wat op Woensdag, 21 Junie aan die Global Golf-borgdag deelgeneem het, behoorlik hulle litte roer om hulle rondes te voltooi. Solly Rautenbach (voorgee 3) wat deesdae vuurwarm gholf speel, het die A-afdeling (voorgee 0-13) maklik gewen op 72 houe.
Pat Good se 82 houe in die B-afdeling (voorgee 14-22) was meer as genoeg om die afdeling te wen. Die vroue se vlag het ook hoog gewapper toe Dawn Wessels op 95 houe in die C-afdeling (voorgee 25+) koningin gekekkel het.
Uitstekende netto-tellings is ook aangeteken en die volgende spelers laat deel in Global Golf se duursame pryse: B Mintoor (65 houe), W Vorster (66 houe), C Jonck (67 houe), asook F Jonck en S van Vuuren op 68 houe. Hartlike dank aan Arrie van der Linde en sy span vir hulle lojale bydrae om elke maand van die dag so 'n reusesukses te maak.
Die Modderfontein Trust-gholfdag wat op Saterdag, 24 Junie aangebied is, het in heerlike Mosselbaai winterweer plaasgevind. Die individuele stableford-kompetisie het as gevolg van die heerlike weer en die puik toestand van die baan uitstekende tellings tot gevolg gehad. Wiekus Pretorius was in die A-afdeling onstuitbaar en op 41 punte het hy sy naaste teenstander met minstens vier punte getroef.
Pat Good wat deesdae gereeld wenkampie toe stap se 42 punte het aan hom die B-afdeling besorg.
Die 77-jarige Paul Gouws het gewys dat hy nog oor vele vaardighede beskik deur op 42 punte sy teenstanders in die C-afdeling hakskene te wys. Paul was dan ook die wenner van die gesogte Modderfontein Trust-trofee wat elke jaar op die spel is.
Goeie tellings is ook deur die volgende spelers aangeteken: J van den Berg, A Zeelie, M Samboer (almal 40 punte), asook W Mitchell en A Bruwer op 38 punte.
Die spelers wat nie in die pryse gedeel het nie se dag is opgehelder met die heerlike kerrie-en-rys wat na die prysuitdeling geniet kon word.
Porri Potgieter wat jaarliks hierdie dag borg se reuse bydrae word opreg waardeer en ons vertrou dat ons nog vir baie jare op sy ondersteuning kan staatmaak. Dankie Porri, ons waardeer jou opreg!
Die winteruitkloprondes vorder fluks, maar spelers word versoek om streng by die afsnydatums te hou.
'n Hele paar verrassings het al opgeduik en die reeks stuur op 'n interessante klomp wedstryde af.
Wenners van die Modderfontein Trutsdag is van links, agter: M Samboer, A Bruwer, J van den Berg en W Mitchell. Voor; P Good, J Lourens en W Pretorius.
'Ons bring jou die nuutste Mosselbaai, Tuinroete nuus'
