MOSSELBAAI NUUS - Die maandelikse houespel kompetisie wat op Woensdag, 18 Februarie plaasgevind het, het 164 spelers baan toe gelok.
Hierdie kompetisie vereis konsentrasie, goeie oordeel en as die wind ook waai, moet jy 'n verskeidenheid houe in jou arsenaal hê indien jy sukses wil proe.
In die A-afdeling het die gesoute Bertu Nel (voorgee 4) bogenoemde kwaliteite ten toon gestel en wen die afdeling op 75 houe. André van Wyk was op 83 houe baas in die B-afdeling.
Dirk Leibbrandt se 100-tal was ook goed genoeg om die C-afdeling in sy sak te steek.
Die volgende spelers het ook in die netto-pryse gedeel: Stefan van Vuuren (69 houe), Kalla Briesies, Dawid Gerber en Roelof Engelbrecht op 72 houe.
Saterdag, 21 Februarie het wind en reën die bo-toon gevoer en slegs 79 spelers was dapper of dom genoeg om die natuur in al sy ele-mente aan te durf. Colin Brown en Earl Manie het die toestande goed hanteer en wen die beterbal stableford kompetisie op 'n verdienstelike 44 punte. Johan van den Berg en Gert Pieterse het ook nie dat die weer hulle onderkry nie en teken 46 punte aan om die B-afdeling op 'n drafstap in te oes. Karools Hauptfleisch en Fanus Minnaar (43 punte), asook Wiekus Pretorius en Michael Malan (42) is ook nie leë hande huis toe nie.
Na verlede week se Klubkampioenskappe het die volgende spelers die Top 16 gehaal en sal in 'n putjiespel-kompetisie teen mekaar te staan kom om die putjiespel kampioen te bepaal: R Botha vs R Combrinck; J van Rensburg vs G Reynolds; D van Heerden vs N Jacobs; C Taute vs J Borchardt; C Brown vs M Lundie; W Vorster vs A Dercksen; J Duminy vs E van den Berg; M Vorster vs J Strauss.
Bogenoemde spelers moet hulle verpligting om betyds te speel voor of op 30 April afhandel. Reël asseblief u uitspeel-wedstryd betyds, aangesien geen uitstel aan spelers verleen sal word om later as genoemde datum te speel nie.
Die vroue se Klubkampioenskappe het op 19 en 20 Februarie plaasgevind. Die talentvolle Anzelle Zeelie het nou reeds die kampioenskap nege keer gewen en dit was ook haar vierde agtereenvolgende oorwinning. Voorwaar 'n prestasie waarop sy met reg trots kan wees! Die merkwaardige 81-jarige Annette Meyer, wat in haar 50+ Kampioenskap gespeel het en die titel 13 keer gewen het, verdien ook spe-siale vermelding.
'n Heerlike week se gholf word u almal toegewens!
Die wenners van Woensdag se gholfdag (agter:) Dawid Gerber, Roelof Engelbrecht, Bertu Nel, Michal Rehr (Raadslid) en Stefan Janse van Vuuren. Voor: Kalla Briesies en André van Wyk.
'Ons bring jou die nuutste Mosselbaai, Tuinroete nuus'
