MOSSELBAAI NUUS - Die moordsaak van 'n Mosselbaaise vrou, Anestacha September wat maande lank vermis was, is Woensdag in die Mosselbaai-streekhof vir verdere verhoor op 2 Junie uitgestel.
Die hof was vandeesweek sedert die aanvang van die saak op Maandag, 3 April weer stampvol met familie en lede van die publiek wat die saak met belangstelling volg.
Johnathan Kannemeyer (47), wat op die moord op Anestacha September tereg staan, is sedert sy arrestasie in Desember 2015 in aanhouding in die George-gevangenis.
Hy is bykans 16 maande na die oorledene se verdwyning aangekeer. September is in Augustus 2014 as vermis aangemeld.
Na verskeie uitgebreide soektogte, is haar oorskot in Februarie 2015 naby die Gondwana-wildreservaat in die Herbertsdale-omgewing gevind.
Getuienis is vandeesweek gedurende die hofverrigtinge gelewer deur SAPD-lede betrokke by die saak, terwyl 'n vorige vriend van September ook getuienis gelewer het.
Op Woensdag is daar videomateriaal, afkomstig van sekuriteitskameras by die Gondwana-wildreservaat, as deel van die getuienis in die saak voorgehou.
Herman Steyn is die staatsaanklaer in die saak en Olof D'Oliviera tree op vir die verdediging.
Klik hier vir vorige artikels:
- Vermiste, vermoorde vrou: Verhoor uitgestel
- Moordverdagte weer in hof vandag
- Man vas oor vermiste, vermoorde vrou
- Vrou se DNA positief geïdentifiseer
- Oorskot tydens soektoeg gevind
- Liggaam tydens soektog gevind
- Soektog na vermiste vrou duur voort
ARTIKEL: CORNELLE CARSTENS, MOSSEL BAY ADVERTISER-JOERNALIS
'Ons bring jou die nuutste Mosselbaai, Tuinroete nuus'
