MOSSELBAAI-NUUS - 'n Lid van die publiek het sy misnoeë op Facebook uitgespreek omdat 'n manlike verpleër aan 'n vrouesaal toegeken is by Life Bay View-hospitaal.

In die plasing op 'n Facebook-groep, Mosselbaai op sy beste, sê die persoon hy wil graag weet wat is die hospitaal se "storie" dat hulle "'n man in 'n vrouesaal met 3 vrouens sit" en dat hulle manlike verpleërs toelaat om vroue te verpleeg.

Mossel Bay Advertiser het 'n navraag aan die hospitaal gerig oor die beleid vir mans en vroue in 'n saal en die verpleging van vroue deur manspersoneel.

Die bestuurder van Life Bay View, Nevil Vlok, sê weens die manier hoe die klaer sy plasing verwoord het, het dit gelei tot 'n wanopvatting dat daar 'n manlike pasiënt in dieselfde kamer as die drie vroue was. "Hy verwys na die manlike verpleër wat aan die kamer toegeken is waar die drie vroue was."

Vlok sê dit is slegs in die intensiewe sorgeenheid en die noodeenheid waar mans en vroue dalk langs mekaar sal lê, of in 'n geval van massa-ongevalle as die lewens van die pasiënte die onmiddellike behoefte aan standaardprosedure oorskry indien daar kapasiteitbeperkings is - hy sê dít het slegs 'n paar keer gedurende die Covid-19-pandemie gebeur.

"Die manlike verpleër is ten volle gekwalifiseerd en bevoeg," sê Vlok.

"Ek het 'n gesprek met die eenheidbestuurder van die spesifieke saal gehad. Sy het gesê wanneer 'n manlike verpleër teenwoordig is, praat hulle eers met die vroulike pasiënt oor of hulle gemaklik sal wees daarmee wanneer dit kom by meer private dele van die liggaam.

"Manlike verpleërs oor die algemeen is ook fisiek sterker as vroulike verpleërs, wat 'n groot veiligheidsvoordeel is wanneer 'n pasiënt wat nie mobiel is nie geskuif of gedraai moet word. 

"Indien 'n vroulike pasiënt ongemaklik is, sal 'n vroulike verpleër geroep word. Die eenheidbestuurder het dit so aan die klaer verduidelik."

‘Ons bring jou die nuutste Tuinroete, Hessequa, Karoo nuus’