MOSSELBAAI NUUS - Slagoffers van seksuele geweld moenie huiwer om 'n saak by die polisie aan te meld nie.
Só het 'n vrou van Albertinia aan die Mossel Bay Advertiser gesê nadat die 41-jarige Ivan Petersen onlangs tot altesaam 64 jaar gevangenisstraf gevonnis is nadat hy haar onder meer verkrag het.
Merryl van Zyl (64), wat aan die koerant toestemming gegee het om haar naam te noem, is in Julie 2014 in haar huis deur Petersen oorval, waarna hy haar verkrag het. Van Zyl se man het Petersen op heterdaad betrap toe hy huis toe gekom het en die beskuldigde, wat slegs gedeeltelik geklee was, in een van die huis se kamers gekry het.
Polisielede het die beskuldigde in die Van Zyls se huis gearresteer.
Op 30 Junie het Landdros Eugenia Jacobs in die George Streekhof tydens haar vonnisoplegging gesê die regering neem ernstige stappe om ‘n standpunt in te neem teen geweld teen vroue en kinders en veral teen kinders en bejaardes.
Landdros Jacobs het gesê vroue en kinders in Suid-Afrika is geregtig daarop om veilig te voel.
Petersen is skuldig bevind aan huisbraak, twee aanklagte van seksuele aanranding, roof met verswarende omstandighede en twee aanklagte van verkragting.
Hy is tot 64 jaar tronkstraf gevonnis, waarvan Petersen 33 jaar effektief moet uitdien.
Die saak is ondersoek deur Ao Alistair Rezant van die Mosselbaai Gesinsgeweld, Kinderbeskerming, en Seksuele Misdrywe Eenheid.
Na afloop van die vonnis het Van Zyl gesê sy kan nou met haar lewe aangaan. Sy was vol lof vir die wyse waarop haar saak deur Ao Rezant en die GKS-eenheid hanteer is.
"Hy het my deurgaans op hoogte gehou van waar die saak staan, het my kom oplaai vir die hofsaak en my absoluut fantasties hanteer na die gebeurtenis. Ek het soveel ondersteuning ontvang."
Van Zyl het gesê sy is verlig die saak is verby en dat sy dankbaar is dit nie met 'n jonger meisie gebeur het nie.
Klik hier vir vorige artikels:
- Albertinia-man kry 64 jaar tronkstraf
- Albertinia rapist awaits sentencing
- Update: 61-year-old woman raped
- Albertinia-man in hof vir verkragting
- 61-jarige vrou in haar huis aangeval
'Ons bring jou die nuutste Mosselbaai, Tuinroete nuus'
