GROOT-BRAKRIVIER NUUSFLITS - Twee mans wat skuldig bevind is aan onder meer poging tot moord nadat 'n 56-jarige vrou van Groot-Brakrivier twee jaar gelede wreed in haar huis in Sandhoogtepad aangeval en vir die dood agtergelos is, is vandag in die Mosselbaai Streekhof gevonnis.
Die beskuldigdes, Lionel Kennedy en die 46-jarige Joseph Motlomelo het die slagoffer aangeval terwyl sy alleen by die huis was.
Een van die verdagtes was 'n voormalige werknemer van die familie.
Die vrou is verwurg en met 'n mes in haar nek gesteek. Kennedy en Motlomelo is skuldig bevind aan huisbraak met die opset om te steel, Roof met verswarende omstandighede en Poging tot moord.
Streeklanddros JC Nortje het beide mans tot effektief 21 jaar gevangenisstraf gevonnis op die drie aanklagte teen hulle.
Meneer Johan Erasmus het in die saak aangekla.
Klik hier vir vorige artikels:
- Aanvallers kry vonnis na amper 1 jaar
- Opvolg: Vrou in Groot Brak aangerand
- Opvolg: Aanval en roof op Groot-Brak-vrou
- Opvolg: Aanvaller in Groot-Brak-huisroof vas
- Vrou van Groot Brak aangerand in huisroof
ARTIKEL: LOUISE KARSTEN, MOSSEL BAY ADVERTISER-JOERNALIS
'Ons bring jou die nuutste Groot-Brakrivier, Tuinroete nuus'
