MOSSELBAAI NUUS - Dit blyk dat die virale meningitis-virus weer die rondte in Mosselbaai doen. Cornelle Carstens het in Januarie berig dat sedert 1 Desember 2015 tot en met 10 Februarie 2016, 42 bevestigde gevalle van meningitis aangemeld is.
Intussen het twee kleuterskole in die omgewing verlede week vir 'n paar dae gesluit toe kleuters met die virus in die hospitaal opgeneem is.
Beide skole het die klaskamers eers ontsmet en skoongemaak en weer op Dinsdag, 22 Maart, heropen.
'n Kleuterskoolhoof van een van die kleuterskole wat gesluit was, het aan die Mossel Bay Advertiser gesê sy het op Woensdag, 16 Maart, haar skool vir 'n paar dae gesluit.
"Die oomblik toe ons hoor dat een van ons kleuters met die meningitis-virus in die hospitaal opgeneem is, het ons die skool gesluit en ontsmet."
Die bestuurder van Munisipale Gesondheid en Omgewingsdienste van die Eden Distrik Munisipaliteit, Johan Compion, het by navraag gesê dat daar sprake was van kinders wat in Mosselbaai met die virus in die hospitaal opgeneem is, maar dat die Wes-Kaapse Department van Gesondheid dit nie amptelik bevestig het nie.
Die Departement het wel bevestig dat volgens hul kennis, sedert Desember, slegs virale meningitis (enterovirale breinvliesontsteking) tot dusver by pasiënte gediagnoseer is.
Beide vorme van die virus is hoogsaansteeklik, hoewel virale meningitis as die minder gevaarlike vorm beskou word. Die meningitis-virus versprei deur druppelbesmetting.
Simptome wat op meningitis-infeksie kan dui sluit in hoë koors, veluitslag, seer keel, erge hoofpyn, naarheid en braking, 'n seer stywe nek, asook ligsensitiwiteit. Sou hierdie simptome voorkom, word aanbeveel dat 'n mediese praktisyn onverwyld geraadpleeg word.
Klik hier vir vorige aritikels:
- Meningitis-gevalle stabiliseer
- Meningitis still doing the rounds in Mossel Bay
- Meningitis still doing the rounds
- Meningitis-virus steeds in omloop
- Several meningitis cases in Mossel Bay
- Meningitis trek kleuters plat
'Ons bring jou die nuutste Mosselbaai, Tuinroete nuus'
