GROOT-BRAKRIVIER NUUS - Terwyl daar verskeie klagtes oor die beweerde tekort aan genoegsame veiligheid by die Groot-Brakrivier Polisiestasie is, blyk dit dat daar nie binnekort oplossings vir die soge-naamde probleme gaan wees nie.
Die voorsitter van die buurt se Gemeenskappolisiëringsforum, Johann Muller, het verskeie kommerwekkende punte wat tydens 'n vergadering tussen die GPF, Polisiesektor, Buurtwagte en Belastingbetalersvereniging genotuleer is, aan die Mossel Bay Advertiser gerig.
Die vergadering is belê nadat die Mossel Bay Advertiser in die uitgawe van 6 Maart berig het oor 'n voorval waar 'n groep van tot 15 oproe-rige mense in die vroeë oggendure van Saterdag, 28 Februarie op die polisiestasie toegesak het nadat twee slagoffers wat deur die ver-dagtes agterna gesit is, by die stasie om hulp aangeklop het.
Daar was een polisiebeampte in die aanklagkantoor en twee polisiebeamptes op patrollie.
Die polisiebeampte is vir minstens 15 minute alleen deur die groep mans gekonfronteer. Die verdagtes was gewapen.
"Die insident is skokkend en die GPF het onmiddelik 'n vergadering belê om die voorval te ondersoek, omdat veiligheid van ons polisie, asook die publiek, vir ons prioriteit is," het Muller gesê.
* 'n Probleem met kommunikasie. Van die polisielede het nie eers kennis gedra van die voorval nie.
* Geen veiligheidshek by die hoofingang vanaf straatkant nie
* Geen heining tussen die gebou en die bestaande heining, wat kriminele daarvan kan weerhou om agterom die gebou te beweeg, skade aan voertuie aan te rig, by die speurders se kantore in te breek en dokumente te verwyder, gevangenis te help ontsnap, ensovoorts; veral as daar net een beampte aan diens is nie.
* Geen voldoende beligting rondom die geboue, veral by die hek.
* Tekort aan personeel / polisiebeamptes. Daar is alreeds verlede jaar vir meer personeel aangevra, maar nog niks is hieraan gedoen nie. Inteendeel, is daar nog beamptes weggeneem en by ander stasies geplaas. Die stasiebevelvoerder is al oor die saak genader. Die kwessie word gereeld bespreek by vergaderings, maar ongelukkig is die bevelvoerder selde teenwoordig.
* Die tekort van personeel veroorsaak dat daar sommige nagte slegs twee personeellede aan diens is; een in die kantoor en die ander lid in sy voertuig op patrollie. Die Groot Brak Polisie bedien 'n gebied van 840vk kilometers. Sou hulle 'n vals klagte kry van een uithoek en 'n werklike klagte in 'n ander uithoek, kan die werklike klaer nie die nodige aandag kry nie, omdat die reistyd te lank kan neem.
* Die insident waarna die media verwys het is nie 'n geïsoleerde geval, soos aangedui is nie. Personeel bevestig dat daar al meer sulke gevalle was.
* Vals klagtes kan veroorsaak dat, as gevolg van 'n tekort aan personeel, kriminele genoeg tyd het om hulle doelwitte te bereik.
* Die polisie veroorsaak dus nie net probleme vir mekaar nie (onvoldoende personeel), maar ook vir die gemeenskap.
* Beamptes wat geskakel moet word om te help bly in die meeste gevalle buite Groot Brak; tyd wat verlore gaan om by die probleem te kom.
* Personeel wat bedank word nie vervang nie, wat 'n verdere druk op die bestaande lede plaas.
Intussen het die stasiebevelvoerder, Kapt Sipho Dyani, egter ontken dat daar enige vorige soortgelyke voorvalle soos dié van 28 Februarie al by die polisiestasie was.
Hy sê die beligting by die polisiestasie is in orde en dat die sekuriteitshek die verantwoordelikheid van die Departement van Openbare Werke is.
Hierop het Muller gesê, "Ons weet Openbare Werke is verantwoordelik vir die sekuriteits-hek, maar wie dryf die probleem, want niks word daaraan gedoen nie."
Kapt Dyani sê dat daar tussen vyf en ses polisielede per skof is.
Bronne wat verkies het om anoniem te bly het egter aan die Mossel Bay Advertiser gesê dat dit selde die geval is, omdat daar gewoonlik een polisielid af siek is en een polisielid op 'n rusdag is.
Volgens Kapt Dyani dra die kantoor geen kennis van 'n aanvraag vir meer personeel nie.
Die Mossel Bay Advertiser is egter in besit van 'n skrywe gedateer 31 Oktober 2014 waarin die GPF 'n versoek vir meer personeel by die spesifieke polisiestasie aan die Provinsiale Polisiekommisaris voorgelê is.
Volgens Muller gaan die kwessie oor die publiek, maar ook oor die polisielede se veiligheid.
"Ons kan nie die probleme net los nie, want iemand kan nog baie seer kry."
ARTIKEL: LOUISE KARSTEN, MOSSEL BAY ADVERTISER JOERNALIS.
'Ons bring jou die nuutste Groot-Brakrivier, Tuinroete nuus'
