MOSSELBAAI NUUS - In nóg 'n tragiese fratsongeluk in Mosselbaai die afgelope 10 dae het 'n 18-jarige jong man van Civic Park, Jacklin Vallentyn, op Maandag, 11 Januarie sy nek op drie plekke gebreek toe hy by die Punt se gewilde swemplek, Die Poort, in die see teen 'n sandbank vasgeduik het.
In twee afsonderlike voorvalle die afgelope paar dae is 'n 17-jarige seun in 'n soortgelyke voorval ernstig by Diasstrand beseer terwyl 'n 18-jarige matriekleerder vanuit 'n Mosselbaaise woonstelblok drie verdiepings na sy dood geval het.
Jacklin se vriend, Shawn Smart (17), sê 'n groep vriende het die middag by die water ontspan en van die stellasies afgeduik.
"Jacklin bly nooit lank onder die water wanneer ons daar by die sloepe swem en duik nie. Maandag het ons gesien hoe hy in die water duik maar hy het nie weer opgekom nie. Die volgende oomblik het hy in die water gedryf. Ek het ingegaan en hom uitgehaal. Hy het pers om sy mond geraak en 'n vrou wat daar gestaan het, het die ambulans gebel."
Die Mosselbaai Brand en Noodeenheid en ambulanse het Jacklin op die toneel behandel en hy is na die George Provinsiale Hospitaal afgevoer.
Die woordvoerder van die Wes-Kaap Gesondheidsdepartement, Bianca Carls, het teen druktyd gesê Jacklin se toestand is krities en onstabiel. Hy het sy C3, C4 en C5 werwels in sy nek gebreek en verwante kopbeserings opgedoen.
Jacklin se pa, mnr Japie Vallentyn (56) het hartseer aan die Mossel Bay Advertiser gesê sy hart pyn oor wat met sy kind gebeur het. Jacklin is 'n leerder aan Die Bultskool in George.
"Ons weet nie of ons kind sal herstel nie. Jacklin is baie goed met houtwerk en sweiswerk, hy sou binnekort homself verder bemagtig met sy talente," het sy hartseer ma, Louise, bygevoeg.
Die woordvoerder van die Mosselbaai Munisipaliteit, mnr Harry Hill, het bevestig dat daar nie lewensredders by Die Poort is nie. "Lewensredders word net gedurende die piekseisoen, ongeveer middel Desember tot die einde van die eerste week in Januarie, en ook net by swemstrande geplaas.
Hoewel daar stellasies by Die Poort is waarvandaan mense in die water kan spring "wanneer die getye dit toelaat", het Hill gesê mense betree die see op eie risiko, selfs al is dit 'n sloep, en dat daar dus nie kennisgewingsborde by die betrokke swemplek is wat swemmers teen enige gevare waarsku nie.
In 'n soorgelyke insident het 'n matriekleerder van die Hoërskool Linden in Johannesburg, JG Oosthuizen, op 4 Januarie sy nek en rugmurg beseer toe hy in die branders by Diasstrand agteroor geduik het. JG het ook in 'n sandbank vasgeduik. Hy is na die MediClinic in George afgevoer waar 'n neurochirurg hom behandel het.
Die Burger het op 12 Januarie berig 'n ses-uur lange operasie op JG was suksesvol en dat sy nek stabiel is maar sy rugmurg steeds skade het en dat hy tans min tot geen gevoel van sy skouers af ondertoe het nie. Hy is intussen na die Netcare-rehabilitasiehospitaal in Auckland Park vervoer.
Op Sondag, 3 Januarie is 'n 18-jarige leerder van Hoërskool Sao Bras, Valdon de Jager, wat vanjaar matriek sou voltooi, tragies dood toe hy in 'n fratsongeluk teen 'n glaspaneel op 'n balkon van die Bayview Manor-woonstelle in Mosselbaai geleun en vier verdiepings ver geval het toe die glas gebreek het.
Valdon het tydens die voorval by een van sy vriende, Austin Brown (16) en dié se gesin, Sumsodine September en sy vrou Beverley asook Austin se 7-jarige sussie, Ashley Brown, gekuier. Hy is met sy aankoms by die Mosselbaai Provinsiale Hospitaal dood verklaar.
Jacklin soos hy as jong seun gelyk het.
ARTIKEL: LOUISE KARSTEN, MOSSEL BAY ADVERTISER-JOERNALIS
'Ons bring jou die nuutste Mosselbaai, Tuinroete nuus'
