MOSSELBAAI NUUS - Ten spyte van beweringe dat die meningitis-virus steeds in Mosselbaai tande wys, blyk die jongste inligting ontvang van die Wes-Kaap Department van Gesondheid, dat besmetting met die virus afgeplat het.
In Januarie vanjaar, kort nadat die skole vir die eerste skoolkwartaal geopen het, het 'n kleuterskool vir 'n paar dae gesluit nadat verskeie gevalle van meningitis onder leerdertjies aangemeld is. Na bewering het nog 'n kleuterskool kort hierna gesluit onder soortgelyke omstandighede.
'n Mosselbaaise pediater, dr Heinrich Sandilands het by navraag gesê dat pediaters hierdie tipe pro-aktiewe stappe aanbeveel ten einde die verspreiding van virusse soos meningitis, te stuit.
Die Wes-Kaap Department het vandeesweek teen druktyd bevestig dat sedert 1 Desember 2015 tot en met 10 Februarie 2016, 42 bevestigde gevalle van meningitis aangemeld is. Volgens die departement, sluit dit 40 gevalle van kinders onder 12-jarige ouderdom en in twee gevalle, volwasse mans in. Die Department het verder bevestig dat geen nuwe gevalle vandeesweek aangemeld is nie.
Hoewel daar na bewering einde verlede week 'n geval van bakteriële meningitis aangemeld is, het die Departement bevestig dat volgens hulle kennis, slegs virale meningitis (enterovirale breinvliesontsteking) tot dusver by pasiënte gediagnoseer is. Beide vorme van die virus is hoogsaansteeklik, alhoewel virale meningitis as die minder gevaarlike vorm beskou word.
Die meningitis-virus versprei deur druppelbesmetting."Ouers word steeds gemaan om op die uitkyk te wees vir simptome wat op meningitis-infeksie kan dui. Dit sluit in hoë koors, veluitslag, seer keel, erge hoofpyn, naarheid en braking, 'n seer stywe nek, asook ligsensitiwiteit," lui 'n verklaring deur die Departement vrygestel.
Sou hierdie simptome voorkom, word aanbeveel dat 'n mediese praktisyn onverwyld geraadpleeg word.
Klik hier vir vorige artikels:
- Meningitis still doing the rounds in Mossel Bay
- Meningitis still doing the rounds
- Meningitis-virus steeds in omloop
- Several meningitis cases in Mossel Bay
- Meningitis trek kleuters plat
ARTIKEL: CORNELLE CARSTENS, MOSSEL BAY ADVERTISER-JOERNALIS
'Ons bring jou die nuutste Mosselbaai, Tuinroete nuus'
