Nóg 'n sakekamer sluit aan

MOSSELBAAI SAKE-NUUS - Nog 'n sakekamer het by die AHi Wes-Kaap aangesluit. Die Klein Karoo-sakekamer wat die gebiede van Uniondale, Haarlem en Avontuur bedien, is die jongste lid van die AHi Wes-Kaap. Bestuurslede van die Klein Karoo-sakekamer is Woensdag tydens 'n geleentheid in George by die AHi Wes-Kaap se kantore deur dr Willie Cilliers, voorsitter van die AHi Wes-Kaap, verwelkom.

Die AHi Wes-Kaap funksioneer as 'n outonome organisasie met 'n direksie. 'n Formele ooreenkoms vir finansieringshulp deur TRIAS, 'n internasionale ontwikkelingsorganisasie wat bande het met die Vlaamse regering in België en die AHi Wes-Kaap, is vroeër vanjaar onderteken. Die AHi Wes-Kaap het ten doel om entrepreneurs-ontwikkeling te bevorder.

Volgens Cilliers is die doel is om nuwe geleenthede te skep vir klein sakeondernemings asook bestaande ondernemings te help met groei. "Ons wil dít doen deur die ontwikkeling en uitbouing van kleinsake- geleenthede."

Tydens die geleentheid waar die Klein Karoo-sakekamer formeel as die jongste lid verwelkom is, het Cilliers gesê die vraag is hoe word mense se drome omgeskakel in sakegeleenthede. Dit gaan oor die skep van nuwe geleenthede. Om dit reg te kry is daar uitdagings. So byvoorbeeld moet die verskillende regeringsfere soos die plaaslike regeringsfeer tot verantwoording geroep word as dit nodig sou wees. Sakekamers moet byvoorbeeld vir munisipaliteite vra om grond beskikbaar te stel vir klein sakeondernemings.

Plaaslike sakekamers het ook 'n verantwoordelikheid om te netwerk en opleiding aan lede te verskaf. Sakeondernemings in dorpe en streke moet met mekaar in verbinding gebring word. As administratiewe rompslomp in die pad staan om nuwe geleenthede vir klein sakeondernemings te ontsluit, moet sakekamers help dat dit uit die weg geruim word.

Volgens Cilliers wil die AHi Wes-Kaap graag hoor wat sê en dink mense op grondvlak. Een van die uitdagings van klein sakeondernemings is om mededingend met groot sakeondernemings te wees. Klein sakeondernemings moet bemagtig word. In dié verband wil die AHi Wes-Kaap help deur byvoorbeeld een van sy vyf streekkantore. Dit gaan gedoen word deur die beskikbaarstelling van opleiding en advies. Eerwaarde Andries Palmer, voorsitter van die Klein Karoo-sakekamer, het gesê die organisasie wil plaaslike sakeondernemings help om beter te kan presteer. Die sakekamer het sowat 100 lede en bestaan al drie jaar.