LANDBOU NUUS - Vere maak beslis die voël, glo die SWD se liefhebbers van skouduiwe.
Op Saterdag 3 Junie, het hulle sterk meegeding om juis dié spreekwoord gestand te doen. Vir baie wat al 'n paar landbouskoue deurgestap het, bly die geveerde dierasies altyd interessant en prettig om te beskou.
Van die interessantste verlede Saterdag was die American Giant Runts wat ampertjies kan deurgaan vir hoenders.
Dan is daar nog meer eksotiese soorte: Gros Mondain, rye van die fyn Mookees en 'n hele span American Show Racers wat so vaartbelyn soos die Concorde is, maar met oulike geveerde pootjies vir 'n supersagte landing.
Altesame 335 duiwe vanuit die SWD-streek het in George byeengekom vir die eerste duiweskou van die soort in George. Die organiseerders hoop om dit 'n gereelde instelling te maak.
Kampioen van skou - Gross Mondain, eienaar Nic Hanekom van Jeffreysbaai,
Eerste reserwe op skou - Satinette, eienaar Johan de Beer van Port Elizabeth,
Tweede reserwe - Mookee, eienaar Deon Bence van Oudtshoorn,
Derde reserwe - Norwich Cropper, eienaar Johnnie Rudman van Port Elizabeth,
Vyfde reserwe - Chinese Owl, eienaar Jannie van der Heever van Riebeeck Kasteel,
Sesde reserwe - American Show Racer, eienaar Jannie van der Heever van Riebeeck Kasteel en
Sewende reserwe - English Clean Legged Longface, eienaar Koot Serfontein van Durbanville.
'Ons bring jou die nuutste Tuinroete, Klein Karoo, Hessequa nuus'
