"Hier's ek weer, hier's ek weer, met my rooi rok voor jou deur.
Ek wil jou hê, ek sal jou kry! Al slaan jou ma my drie maal op my kop,
dan staan ek op,
en kom ek weer."
Aan die begin van 'n nuwe jaar staan ons net soos die moedige vrou in die ou volksliedjie vol afwagting dat haar geliefde die deur oopmaak en 'n toekoms gevul met belofte ontsluit.
Ons hoop vir die beste, maar, ondanks ons optimisme en ewige hoop, kry baie van ons elke jaar 'n klap in plaas van 'n soen.
Aan baie van die klappe kan jy weinig of niks doen nie en so staan jy dan elke oujaar 'n aks meer vuisvoos voor die deur in jou rooi rok en hoop op daai soen, maar tog ook net so 'n bietjie meer gereed om te koes vir die klap.
Soos my oom altyd gesê het: Dis die aarde dié, nie die hemel nie.
Maar die hoop beskaam nie en gelukkig is die meeste van ons aanmekaargesit om te glo geluk en sukses lê net om die volgende draai of Oujaarsaand.
En hier begin die preek. Veral skoolverlaters moet nou mooi lees.
Die lewe is kort. As jy daai rooi rok aantrek, maak seker jy staan voor die regte deur.
As jy 'n paar klappe moet vat op jou lewenspaadjie, maak seker dit is vir iets wat jou vul met passie - iets wat jy absoluut wil doen - eenhonderd persent.
Elke mens het iets wat sy of haar hartsnare roer. 'n Roeping. Moenie as jy byvoorbeeld 'n passie het om ander te leer, dink, nee, ek moet liewer 'n rekenmeester word, die geld is beter nie. Al het jy 'n A vir boekhou gekry.
Word 'n onnie! Jy sal die beste onderwyser en mentor wees en elke oomblik geniet. Jy sal miskien nie die nuutste Duitse nutsvoertuig bestuur nie, maar jou werksbevrediging sal jou duisend keer meer plesier gee as enige 4x4 of sportmotor. En as jou werk werklik jou passie is, is die kans uitstekend dat jy die hoogste sport sal bereik en dat geld en status outomaties sal volg.
Sit alles in om jou drome te bewaarheid. As jy 'n sanger wil word, neem sanglesse en bemeester 'n musiekinstrument. Skryf in vir al wat 'n talentkompetisie is. Maar, 'n mens moet ook realisties wees. Dit help nou nie jy kraai soos 'n kat en het vyf duime en hoop om die volgende Eric Clapton te word nie.
Dan moet jy 'n musiekpromotor of agent word en so jou passie vir sang en musiek uitleef. As jy werklik wil, sal jy jou kan inwurm in die wêreld waar jy jouself sien en waar jy hoort. Natuurlik sal jy op pad na jou droom talle minder aangename joppies moet verrig, maar solank jy 'n plan het met 'n doel in sig, staan jy voor daai deur met 'n lied in jou hart en 'n siel vol hoop.
Die alternatief is 'n lewe en 'n werk wat altyd 'n tikkie frustrerend en onbevredigend is.
"Hier's ek weer, hier's ek weer, met my rooi rok voor jou deur.
Ek wil jou hê, ek sal jou kry! Al slaan jou ma my driemaal op my kop, dan staan ek op, en kom ek weer."
Gaan Google die liedjie. Dis nou dalk nie Justin Bieber nie, maar anders as 'n Bieber-song, vul dié woorde jou met die moed en geesdrif wat jy nodig het om jou drome 'n realiteit te maak. Want, so tussen die klappe deur kry jy darem 'n paar soene ook.
Mag 2017 gevul wees met baie soentjies.
DEUR ILSE SCHOONRAAD, GEORGE HERALD-REDAKTEUR
'Ons bring jou die nuutste George, Tuinroete nuus'
