Slagoffer se seuntjie sal sy pa nooit ken

MOSSELBAAI NUUS - "Hulle sê ons niks. My seun is dood, sy kollega is dood, maar niemand het nog aan ons verslag gedoen oor wat gebeur het nie."

Dit is die wroeging waarmee Sheradon Baker se ma, Sharon Minnies, worstel; wat presies het gebeur wat tot haar seun se dood aanleiding gegee het.

"Die mense sê Sheradon het om hulp geroep voordat hy blykbaar vir Mkutukana Luvuyo gaan help het. Hulle was by Unit 27. Ek het vandag (Woensdag, 1 Februarie) my kind se liggaam gaan uitken, maar ek ken nie die antwoorde op al ons vrae nie?"

Sharon staar die niet in, emosie sit vlak in haar oë. Sy het nie net 'n seun nie, maar ook die huis se broodwinner verloor. Sedert haar man onlangs oorlede is, het Sheradon met sy gesin by haar kom woon om na haar om te sien.

Dis vir haar moeilik om te verwerk dat haar seun om sowat 16:20 op Dinsdag, 31 Januarie by die PetroSA-aanleg in 'n ongeluk was, maar dat sy eers omstreeks 19:00 van sy dood ingelig is.

"Wat ons weet, lees ons op facebook, ander mense weet meer as ons."

Ongebore seun

Nie net het die ongeluk 'n seun, pa en eggenoot geëis nie, maar 'n ongebore seuntjie sal grootword sonder om ooit sy eie pa te ken.

Sheradon se seuntjie sal na verwagting op 21 Februarie gebore word, en sal wel altyd weet hy was sy pa se hartsbegeerte.

"Sy naam is Rushin. Hy sal 'n boetie wees vir Sheradon se twee meisietjies, Rushé en Leashé. Sheradon kon amper nie meer wag vir sy seuntjie se geboorte nie," sê Ruzelle hartseer.

By hul huis in Adriaansrylaan kom en gaan vriende en kollegas wat hul medelye kom betoon. Hulle vertel van 'n skrander man wat vandag, Vrydag 3 Februarie, sy eksamen as voorman sou aflê en sê hy sou dit met vlieënde vaandels geslaag het.

"Daai man kon werk, hy het voor gevat," sê 'n vriend wat verkies om nie sy naam te noem nie.

Hy en Luvuyo was my vriende, ons het soos 'n familie saam gewerk. Weet jy wat gaan deur my kop? Ek hoor nog die laaste woorde wat ek van Luvuyo oor die radio gehoor het..."

Vriende is dit eens dat beide mans goed gekwalifiseerd was en baie deeglik was in wat hulle aangepak het. Daarom, juis, is daar soveel vrae. Hulle en die familie meen dit is hul reg dat al hul vrae beantwoord moet word.

"Wat sê ek oor 10 of 20 jaar vir my seun oor sy pa se dood, wat sê ek was die oorsaak as niemand my vrae antwoord nie?"

* Met die ter perse gaan was begrafnisreëlings nog nie bekend nie. Die Advertiser kon teen druktyd nie kommentaar oor die voorval van Mkutukana Luvuyo se familie bekom nie.

Klik hier vir vorige artikels:

ARTIKEL & FOTO: NICKEY LE ROUX, MOSSEL BAY ADVERTISER-NUUSREDAKTEUR

'Ons bring jou die nuutste Mosselbaai, Tuinroete nuus'