MOSSELBAAI NUUS - Vir die eerste keer in 17 jaar is die eerste sooi vir nuwe huise op Herbertsdale gespit. In die grootste kapitale projek tot nog toe op dié dorp, word 154 nuwe huise eersdaags in die vooruitsig gestel.
Hoewel daar aanvanklik in 2012 deur die Wes-Kaapse Provinsie aangedui is dat die projek tot 2018 uitgestel sou moes word, het Raadsheer Jim van der Merwe op Donderdag, 15 Januarie die eerste sooi gespit vir die nuwe behuisingsprojek.
"Ek besef daar was in 2012 groot teleurstelling toe aangekondig is dat die projek uitgestel is. Voortgesette onderhandeling het meegebring dat die projek nóu aangepak kan word en ek moet wykskomiteelede Herandien, Gelderblom en die voorsitter van die Begunstigde Komitee, Deseré Charles, vir hul voortgestte betrokkenheid en moeite bedank," het Raadsheer Van der Merwe aan talle gemeenskapslede wat die sooispitseremonie bygewoon het, gesê.
Hy het die gemeenskap vir hul geduld en die wyse waarop hulle die vertragings in die voorsiening van behuising hanteer het, bedank.
Projek van miljoene Rand
Die projek behels siviele dienste aan 154 erwe teen 'n projekwaarde van bykans R7.5-miljoen. Die huise wat uiteindelik ingevolge die jongste standaarde op hierdie erwe opgerig sal word, sal teen 'n projekwaarde van sowat R16.8-miljoen gebou word.
Op Maandag, 19 Januarie het die kontrakteurs met opmetings begin sodat die eerste grondwerke reeds op 26 Januarie kan volg. Die beplanning is dat die siviele dienste sowat 10 maande sal duur. In hierdie tyd sal 'n tender vir die bou van die huise uitgereik word sodat die bou van die huise, wat uit 40 vierkante meter strukture sal bestaan, kan volg.
Na verwagting sal die projek in 2016 voltooi word. Die onderskeie kontrakteurs sal met hierdie projek verskeie werksgeleenthede in die gemeenskap skep.
Herbertsdale, wat sowat 3 500 inwoners het, sal na afhandeling van die projek aansienlik anders daar uitsien. Die ligging van die projek bring mee dat die nuwe huise besondere uitsigte oor die vallei sal hê. Die 154 nuwe huise sal die woongebied aansienlik uitbrei. Benton Hill het tans 273 wonings. Boonop word die area met die plaveisel van verskeie bestaande paaie verfraai.
Wykskomiteelid Gelderblom het Raadsheer van der Merwe, mnre Johan van Zyl en Riaan Pienaar van die Mosselbaai Munisipaliteit en die onderskeie kontakteurs se verteenwoordigers, mnr Prien Naicker van RK Sauer en die projekbestuurder van CSM Raadgewende Inginieurs, mnr Jaco Alexander, vir hul teenwoordigheid by die sooispitseremonie bedank. Hy het bygevoeg dat die projek sal bydra om die behuisingsnood in die area te verlig.
Wykskomiteelid Herandien het die gemeenskap op sy beurt gevra om steeds geduld aan die dag te lê aangesien die projek eers teen ongeveer einde 2016 afgehandel sal wees.
"'n Huis is seker 'n mens se grootste bate. Beplan nou reeds hoe na hierdie bate omgesien moet word. Neem met trots besit van die huise wanneer die projek afgehandel is," het hy gemaan.
ARTIKEL EN FOTO: NICKEY LE ROUX, MOSSEL BAY ADVERTISER-JOERNALIS
'Ons bring jou die nuutste Mosselbaai, Tuinroete nuus'
