MOSSELBAAI NUUS - Inwoners van die Protea Aftreeoord in Zetastraat leef in vrees sedert die gebied skynbaar deur misdadigers geteiken word.
Binne sowat 24-uur tussen 31 Januarie en 1 Februarie het inwoners van dié aftreeoord, maar ook ander inwoners van die area, onder diewe se gulsige hande deurgeloop.
In die eerste voorval is toegang deur 'n
venster na 'n woning in die aftreeoord verkry, en 'n skootrekenaar ter waarde van R6 000 is gesteel.
Kort hierna is 'n swart MP3-speler uit 'n Nis-san-bakkie, wat buite die aftreeoord geparkeer was, gesteel.
'n Bekommerde inwoner, wat verkies om anoniem te bly, het aan die Mossel Bay Advertiser gesê inwoners van die aftree-oord vrees sedertdien vir hulle veiligheid.
Toegang is tot die aftreeoord verkry deur 'n deel van die palisadeheining om die aftreeoord onderlangs om te buig.
Omliggende area
Dit is egter nie nét die aftreeoord wat deur misdaad geteister word nie.
Tussen 29 en 30 Januarie is 'n toerustinghouer en skoonmaakmateriaal uit 'n voertuig in Van der Rietstraat, Da Nova, gesteel.
Toegang tot die voertuig is verkry deur die kattebak oop te forseer. Die waarde van die gesteelde goedere beloop R8 200.
Dieselfde dag is 'n Samsung-selfoon en kontant uit 'n voertuig in Da Gamastraat gesteel. Die slagoffer het haar voertuig in 'n motorhuis parkeer, maar die voertuig met die goedere daarin, ongesluit gelos.
Met haar terugkeer het sy gesien dat haar besittings vermis word. 'n Man wat vir die vrou werk is wel deursoek, maar geen gesteelde goedere is in sy besit gekry nie.
Op 31 Januarie is daar by 'n woning in Langstraat, Mosselbaai, ingebreek nadat toegang deur 'n skuifdeur verkry is. 'n Silwer Monica-fluit, horlosie, dvd-speler, 'n beursie en televisie is gesteel.
Dieselfde dag is 'n motorhuisdeur in Pointweg, Mosselbaai oopgeforseer. Die verdagte is op heterdaad in die motorhuis betrap en die Mosselbaai SAP is ontbied.
Mandrax-tablette is in sy besit gevind en hy is gearresteer.
Lede van die Joshua Generation-kerk in Schoemanstraat het òòk deurgeloop onder misdadigers toe daar tydens 'n erediens om 19:00 op 29 Januarie by drie voertuie ingebreek is.
Goedere ter waarde van sowat R8 000 is uit die drie voertuie gesteel.
Die woordvoerder van die Mosselbaai SAPD, ao Pieter Koekemoer, sê die polisie sal alles in hul vermoë doen om die skuldiges vas te trek.
"Ons volg steeds leidrade op en het ook die plaaslike buurtwag hiervan bewus gemaak. Ons vra inwoners om nie hulle voertuie buite te parkeer nie en ook nie waardevolle items daarin te los nie."
Klik hier vir verwante artikels:
- Noue ontkoming vir Hartenbos Heuwels-vrou
- Seuns gevonnis vir aanval op bejaarde
- Man by huis in Hamelkop aangeval
ARTIKEL: LOUISE KARSTEN, MOSSEL BAY ADVERTISER-JOERNALIS
'Ons bring jou die nuutste Mosselbaai, Tuinroete nuus'
