SUID-KAAP NUUS - Die blinklywe het gulsig gebyt in die jongste interklub-ligakompetisie van Suid-Kaap Kushengel, toe 'n hele vrag vis aan wal gebring is.
'n Totaal van 847 visse met 'n totale gewig van 3 562kg is in die Wildernis-gebied gevang, waarvan 844 visse weer lewendig teruggesit is.
Stilbaai het weer goed gevaar en die dag eerste afgesluit met George kort op hulle hakke.
Tony Harding, van Atlantic Hengelklub, het die grootste eetbare vis, 'n kabeljou van 9kg, gevang, met Ruben Gouws van George Hengelklub wat die grootste oneetbare vis, 'n skeurtandhaai van 84kg, geland het.
Antoi Forbes, een van die vroue hengelaars van Knysna Hengelklub, het 'n fris hondhaai van 15kg gevang en 'n hele paar manlike hengelaars op hul neuse laat kyk.
Borge wat die betrokke dag moontlik gemaak het, was Arms & Tackle, SportCentre en X-Treme Fishing in George asook Sedgefield Arms Restaurant, Cosy Homes (Sedgefield) en Crause Broers Slaghuis op Groot-Brakrivier.
A-liga: 1. Stilbaai 545.65; 2. George 462.45; 3. Outeniqua 431.11; 4. Atlantic 336.01; 5. Knysna 286.44; 6. Triton 203.21; 7. Mosselbaai 123.96.
B-liga: 1. George 245.96; 2. Weermag 207.24; 3. Atlantic 167.07; 4. Knysna 144.99; 5. Outeniqua 143.85; 6. Stilbaai 139.42; 7. Triton 49.07.
'Ons bring jou die nuutste Suid-Kaap nuus'
