MOSSELBAAI NUUS - Hoewel die Demokratiese Alliansie (DA) steeds met 'n beduidende meerderheid in Mosselbaai - en vir 'n derde termyn - aan bewind is, is die politieke speelveld met die tussenkoms van kleiner partye ietwat verlê.
Dit is veral die Vryheidsfront Plus wat, hoewel met kleiner getalle, hul teenwoordigheid in Mosselbaai goed aangekondig het. Die EFF het in 'n paar wyke ook vuis gebal.
Die algehele stempersentasie is volgens voorlopige syfers 61.6%, wat effens laer is as die 64.8% wat in 2011 behaal is.
Teen 08:00 op Donderdagoggend het die Wes-Kaap volgens die OVK se webblad reeds 64.49%, oftewel 1 326 642 van die stemme teenoor die ANC se 24.55% gehad.
Met partye wat in Mosselbaai volgens die formule wat gebruik word 'n setel op die raad te bereken ten minste 1 352 stemme benodig, wil dit voorkom asof Icosa, die VF+ en ACDP voortaan deel van die Raad mag uitmaak.
Met 10 van die 14 wyke in die DA se guns, soortgelyk aan wat tans die geval is, sal die proporsionele stemme gevolglik 'n beduidende invloed op die samestelling van die finale raad hê.
Die DA het Wyke 4, 5, 6, 7, 8, 9, 10, 11, 13 en 14 ingepalm, met die ANC wat Wyke 1, 2, 3 en 12 gekry het. Uitslae teen druktyd dui daarop dat die DA 62,28% van die stemme op die party verenig het.
Wyk 8
In Wyk 8 in Mosselbaai is volgens voorlopige aanduidings 'n totale stempersentasie van meer as 90% behaal, en die DA het 'n wegholoorwinning met 88.55% van die stemme behaal.
Die DA het vir die Eden-distriksraad 1 907 stemme op hom verenig, teenoor sy naaste teenstander, die ANC, se 28. Hierbenewens het die ACDP 58 stemme gekry, teenoor die VF+ se 94 (6.64%), en die ACDP se 1.79%.
Wat die stemme as wyksraadslid betref, het die Demokratiese Alliansie se onderburgemeesterskandidaat, Dirk Kotzé, loshande die posisie ingepalm.
In Reebok het die Vryheidsfront Plus (VF+) en ACDP volgens voorlopige syfers die ANC as amptelike opposisie onttroon.
Die DA het vir die Eden-distriksraad 1 411 stemme gewen, met die VF+ wat 107 stemme gekry het en die ACDP wat 27 stemme gewen het. Die ANC het 14 stemme ingepalm. Die kleiner partye wat elk een stem aangeteken het, is die PBI, Cope, SARCO, CDI, SAC en AIC.
Die DA het ook die setel oortuigend gewen met 1 414 stemme teenoor die VF+ se 104. Die ACDP het 36 stemme getrek met die ANC (17) en EFF (1).
Die DA se wyksraadskandidaat, Anton Dellemijn, het 1 402 stemme op hom verenig en die wyk oortuigend gewen met 89.68%, met die VF+ (110), ACDP (31), ANC (18), PBI (1) D'Almeida Civic (4) en Icosa (1) daarnaas.
In Wyk 6, waar Mark Furness die DA verteenwoordig, het die DA eweneens loshande gewen en het 86% van die kiesers hul stemme uitgebring. Die DA het vir die Eden-distriksraad 2 833 stemme getrek teenoor sy naaste teenstander, die VF+ (176). Die ACDP (124), ANC (118), EFF (29) en Icosa (9) het vir die restant gesorg.
Wat die proporsionele stemme betref, het die DA 2 809 stemme getrek, die VF+ (159), ANC (123), EFF (29) en Icosa (12). Furness het as wyksraadslid verreweg die meeste stemme getrek met 2 820. Die ACDP (153), VF+ (149), ANC (110), EFF (22) en Icosa (10) het die verskil opgemaak.
Wyk 7 - Die DA wen met 77.37%, teenoor die VF+ se 4.7% en ACDP se 3.37%
Wyk 4 - Die DA wen die wyk met 79.18% van die stemme teenoor die ANC se 11.61% en VF+ se 4.3%
Wyk 1 - Die ANC wen oortuigend met 91.78% teenoor die DA se 3.92% en die EFF se 3.77%
Wyk 3 - Die ANC wen oortuigend met 67.64%, teenoor die DA se 21.63% en die EFF se 3.58%
Wyk 13 - Die DA wen naelskraap met 41.08% teenoor die ANC se 39.84% en Icosa se 10.19%
Wyk 14 - Die DA wen met 'n klein marge met 49.44% teenoor die ANC se 39.84% en Icosa se 10.19%
Wyk 10 - Die DA wen met 90.04% teenoor die VF+ se 6.05% en die ACDP se 1.4%
Met die ter perse gaan, was die laaste vier wyke se resultate nog nie bekend nie.
Vir bevestigde resultate, besoek gerus die webblad: https://www.elections.org.za/LGEDashBoard2016/
Op Donderdag-oggend, 4 Augustus, omstreeks 02:30, het die uithouer DA raadslede hul party se klinkklare oorwinning in die Mosselbaai streek gevier. Foto: Nickey le Roux
ARTIKEL EN FOTO: NICKEY LE ROUX, MOSSEL BAY ADVERTISER-JOERNALIS
'Ons bring jou die nuutste Mosselbaai, Tuinroete nuus'
