MOSSELBAAI NUUS - ’n Mosselbaaier, Luwellen Marx (56), het in die tweede seisoen van die TV-program, Die Brug, op ons skerms verskyn.

Die program behels ’n groep vreemdelinge wat moet saamwerk om ’n brug na ’n skat ter waarde van R1 miljoen te bou. Die tweede seisoen daarvan het Donderdag, 8 Mei, op kykNET begin.

“Die oproep tot inskrywings is op kykNET, DStv-kanaal 144, geadverteer. Nadat ek die advertensie gesien het, het ek besluit om ’n kans te waag en my aansoek ingedien,” het Marx vir Mossel Bay Advertiser gesê.

Hy is toe gekontak om in Junie 2024 deur die rolverdelingsproses te gaan. Die verfilming het ’n maand lank in die Outeniekwaberge plaasgevind.

Hy beskryf die ervaring as ’n eens-in-’n-leeftyd een. “Dit was nog altyd ’n droom van my om op TV te wees - so dit was ’n droom wat waar geword het,” sê hy.

Marx is die afgelope sewe jaar ’n ernstige Crossfit-atleet, en het deur die jare aan verskeie kompetisies deelgeneem. 

Hoewel hy agtergrond in intense fisieke oefening het, sê Marx dat hy nie veel voorberei het om op Die Brug te verskyn nie. 

“Ek wou met ’n oop gemoed daarop ingegaan het en ’n ernstige poging as deel van my spelplan aangewend,” het hy vir die Advertiser gesê.

Vir Marx was ’n hoogtepunt beslis die feit dat hy die geleentheid gehad het om deel van hierdie werklikheidsprogram te wees - en om sy gemeenskap, sy kinders, kleinkinders en al sy sportkinders trots op hom te maak.

Toe hy gevra is of hy weer so iets sou doen, het Marx geantwoord: “In ’n hartklop!”

Seisoen twee word op kykNET uitgesaai. 

‘Ons bring jou die nuutste Tuinroete, Hessequa, Karoo nuus’