HERBERTSDALE NUUS - Die twee jong mans wat 'n bejaarde vrou op 7 November 2014 aangeval en haar onder meer met 'n snoeiskêr toegetakel het, is op Donderdag, 28 Januarie tronk toe gestuur.
Die twee is skuldig bevind aan huisbraak, roof met verswarende omstandighede en verkragting. Die saak spruit uit 'n aanval op me Lunelle Honiball, wat ten tye van die voorval in 'n huis op die plaas Tierkloof in die Herbertsdale-distrik gewoon het.
Honiball was 82-jaar oud toe die voorval plaasgevind het. Sy het die aanval op haar, wat bykans twee ure geduur het, oorleef.
Sy is destyds met verskeie kopbeserings in die Mosselbaai Provinsiale Hospitaal opgeneem nadat die twee mans haar herhaaldelik met 'n snoeiskêr en ander voorwerpe aangerand het. Dit was die eerste plaasaanval in die distrik.
Die KwaNonqaba-polisie het kort na die voorval twee verdagtes van onderskeidelik 17- en 18-jaar, in hegtenis geneem. Van die slagoffer se gesteelde goedere is in hul besit gevind.
Die jongste beskuldigde is tot 12 jaar gevangenisstraf gevonnis terwyl die 18-jarige beskuldigde tot 15 jaar tronkstraf gevonnis is.
Die slagoffer, wat onlangs 83-jaar oud geword het, het aan die Mossel Bay Advertiser gesê sy is verlig die hofsaak is verby. "Nou kan ek met my lewe aangaan."
Klik hier vir vorige artikels:
- Seuns gevonnis vir aanval op bejaarde
- Herbertsdale-aanvallers eersdaags gevonnis
- Herbertsdale-plaasaanvallers skuldig
- Herbertsdale-aanvallers se verhoor begin
- Vrou wreed op plaas aangeval
ARTIKEL: LOUISE KARSTEN, MOSSEL BAY ADVERTISER-JOERNALIS
'Ons bring jou die nuutste Herbertsdale, Tuinroete nuus'
