Nóg 'n tiener uit Powertown vermis

GROOT-BRAKRIVIER NUUS - Nóg 'n leerder van die Groot-Brakrivier Sekondêre Skool is as vermis aangemeld, skaars twee maande nadat die liggaam van 'n mede-leerder, die 17-jarige Lesley-Ann Maya, in die woongebied Powertown naby Klein-Brakrivier gevind is.

In November verlede jaar is 'n 15-jarige leerder van dieselfde skool, Elouise Witbooi, óók dood aangetref in 'n beboste gebied in Wolwedans, Groot-Brakrivier. Haar liggaam was so erg ontbind dat die oorsaak van haar dood nog nie bepaal kon word nie.

Beide meisies is as vermis aangemeld, maar is later dood gevind.

Bonique Jansen (15) is op Saterdag, 13 Junie laas lewend gesien toe sy by haar pa, Abraham, in Powertown gekuier het en teen ongeveer 19:00 die aand na bewering terug na haar ma se woning in dieselfde woongebied gestap het.

Haar ouers se huise is ongeveer 800m uitmekaar. Bonique het egter nooit by haar ma se huis opgedaag nie en is op Maandag, 15 Junie by die Groot-Brakrivier Polisiestasie as vermis aangemeld.

Volgens haar ma, Marchelle, het Bonique altyd huis toe gekom.

Sedertdien het soekspanne, 'n redding- en opsporingshond en gemeenskaplede onverpoos na Bonique begin soek. Teen druktyd was daar egter steeds geen teken van haar nie.

Die skoolhoof van Groot-Brakrivier Sekondêre Skool, mnr Lloyd Petersen, het aan die Mossel Bay Advertiser gesê hy is geskok oor die feit dat nog 'n leerder van sy skool weg is.

"Ek verstaan nie hoekom dit met ons kinders gebeur nie. Dit ontstel my en ek is bekommerd oor die tendens wat hier plaasvind."

Volgens die DA se wyk 5 voorsitter, Anton Dellemijn, wat saam met lede van die Midbrak Buurtwag na Bonique begin soek het, is die nuus van nog 'n tiener wat vermis word, verontrustend.

"Dit hoort nie so nie. Ons is veronderstel om 'n veilige gemeenskap te wees en ons moenie vrees vir ons kinders se veiligheid nie. Erens is daar euwel. Hoe kan 'n kind net wegraak? Dit breek 'n hele gemeenskap!"

Ook die vermoorde Lesley-Ann Maya se ma, Remona, het sedert Maandag na Bonique help soek. Tydens die soektog na Bonique is pantoffels en 'n kledingstuk van Lesley-Ann boonop in die veld gevind, wat haar hartseer ma se wonde weer oopgekrap het. 'n Nadoodse ondersoek het aangetoon dat Lesley-Ann verwurg is.

"Dit gaan baie sleg met ons," het Remona aan die Mossel Bay Advertiser gesê.

Nog niemand is in verband met haar kind se dood gearresteer nie. Remona staan tans Bonique se ma by, maar sê sy het nie vir Marchelle antwoorde nie.

'n Gemeenskapleier van Powertown, Colin Syfers, sê die voorval is tragies.

"Bonique het geen besittings saam met haar gevat nie. Hoe kan geen kind of mens haar gesien het nie? Dis asof niemand hieroor wil praat nie."

'n Beloning van R5 000 word aangebied vir enige inligting wat kan lei tot 'n arrestasie.

Die saak word deur Ao Gerald Rabie van die Groot-Brakrivier Polisie ondersoek. Indien jy inligting oor Bonique se verdwyning het, kontak 044 620 8300 of 082 469 6805.

Klik hier vir 'n vorige nuusflits.

Vorige artikels:

Lesley-Ann Maya (17) het vermis geraak op 13 April vanjaar en is op 18 April tussen riete gevind, skaars 300m van haar huis af. Sy is verwurg. Nog geen verdagtes is sedertdien gearresteer nie.

Elouise Witbooi (15) het vermis geraak in Oktober 2014 en haar liggaam is twee maande later 'n paar honderd meter van haar huis in Wolwedans gevind. Haar liggaam was so erg ontbind dat die oorsaak van haar dood nog nie bepaal kon word nie. Niemand is in verband met haar dood gearresteer nie.