Gratz: Burgemeester verduidelik optrede

MOSSELBAAI NUUS - Die bedanking van die Munisipale Bestuurder, dr Michele Gratz, en my daaropvolgende versoek dat sy haar kantoor met onmiddellike effek moet ontruim, het ongelukkig onlangs tot baie spekulasie in die media, asook sosiale media, gelei.

Dit is jammer, aangesien my besluit gebaseer was op die operasionele behoeftes van die Munisipaliteit, en in besonder die behoefte om 'n waarnemende bestuurder aan te stel wat beskikbaar sal wees om 'n gladde oorgang na die plaaslike owerheidsverkiesing in Augustus vanjaar te bewerkstellig wanneer 'n nuwe munisipale bestuurder aangestel sal word.

Ek is tevrede dat die korrekte prosesse gevolg en dat 'n geldige raadsbesluit hieroor geneem is.

Geen ongerymdhede

Ek wil dit kategories stel dat daar niks verdag aan die situasie is nie, of enige gronde van ongerymdhede, dissipline of wanprestasie was wat daartoe aanleiding gegee het nie.

Inderdaad, ek het reeds in die openbaar my waardering uitgespreek vir die groot rol wat dr Gratz gespeel het in die vestiging van die Mosselbaai Munisipaliteit as een van Suid-Afrika se voorste munisipaliteite, en die talle toekennings en eerbewyse wat dit onder dr Gratz se leiding ontvang het.

'n Ooreenkoms is ingevolge dr Gratz se dienskontrak bereik om haar pos vroeër te ontruim.

Ek vertrou dat die situasie nou duidelik is, en wens haar alles van die beste vir die toekoms asook gehaltetyd saam met haar gesin toe.

Die DA se Voorsitter van die Oos-streek, Jaco Londt (LP) het reageer: "Hierdie aangeleentheid is een tussen 'n werkgewer en 'n werknemer. Die Burgemeester het binne haar regte opgetree en haar besluit was in die beste belang van Mosselbaai.

Die besluit het die belastingbetalers van Mosselbaai geen geld gekos nie en was ter wille van stabilitiet vir die res van die huidge termyn en om 'n gesonde grondslag te lê vir die volgende termyn".

Klik hier vir vorige aritkels: