HERBERTSDALE NUUS - Die twee verdagtes wat 'n bejaarde vrou op 7 November 2014 aangeval en haar onder meer met 'n snoeiskêr toegetakel het, word na verwagting op 26 Januarie gevonnis.
Die twee is skuldig bevind aan huisbraak, roof met verswarende omstandighede en verkragting.
Die saak spruit uit 'n aanval op me Lunell Honiball, wat ten tye van die voorval in 'n huis op die plaas Tierkloof in die Herbertsdale-distrik gewoon het. Honiball was 82-jaar oud toe die voorval plaasgevind het. Sy het die aanval op haar, wat bykans twee ure geduur het, oorleef.
Sy is destyds met verskeie kopbeserings in die Mosselbaai Provinsiale Hospitaal opgeneem nadat die twee mans haar herhaaldelik met 'n snoeiskêr en ander voorwerpe aangerand het. Dit was die eerste plaasaanval in die distrik.
Die KwaNonqaba-polisie het kort na die voorval twee verdagtes van onderskeidelik 17- en 18-jaar, in hegtenis geneem.
Van die slagoffer se gesteelde goedere is in hul besit gevind. Die mans het op 20 Januarie in die Mosselbaai Streekhof verskyn waarna die saak na 26 Januarie uitgestel is.
Klik hier vir vorige artikels:
- Herbertsdale-plaasaanvallers skuldig
- Herbertsdale aanvallers se verhoor begin
- Vrou wreed op plaas aangeval
ARTIKEL: NICKEY LE ROUX, MOSSEL BAY ADVERTISER JOERNALIS
'Ons bring jou die nuutste Mosselbaai, Tuinroete nuus'
