TUINROETE NUUS EN VIDEO - Drie seuns wat pas aan Hoër Landbouskool Oakdale in Riversdal gematrikuleer het is tans op toer vir die komende week met twee kitare en hul musikale talent. Die drie musikante se toer tussen George en Struisbaai het gister, Maandag 16 Desember afgeskop en duur tot Vrydag 20 Desember.
Dewalt Jonck en Wihen Conradie, beide van George, is kranige kitaarspelers wat ook sing. Dewalt speel mondfluitjie en kitaar, net soos sy oupa Prop Goosen. Wehan Swart kom van Bredasdorp en sorg vir die klank en bemarking op Instagram (planCea). Al drie studeer volgende jaar by Universiteit Stellenbosch.
Tydens hul skooljare by Oakdale het die drie in die skoolgroep, The Rolling Oaks, opgetree. Intussen het hulle hul eie musiekgroep begin by name "planCea".
VIDEO - Dewalt Jonck en Wihen Conradie deel een van hul liedjies:
Konserte in George
Dié jong musikante het gister by die Garden Route Mall en Eden Meander Mall opgetree, met 'n aandkonsert by 'n privaatwoning. Hier het hulle sakgeld verdien vir petrol en kos vir hulle toer vorentoe.
Intussen is die drie nog hard op soek na 'n lekker plek om op te tree in Robertson (19 Desember) en Struisbaai (20 Desember). Kontak Dewalt Jonck by 064 551 0933 vir meer inligting.
Die res van hul toerprogram
- Dinsdag 17 Desember: Hartenboswaterfront; BigBlu Zipline, Mosselbaai (13:30); Jongensdal, Stilbaai (18:00).
- Woensdag 18 Desember: Sterrehemel Stilbaai (11:00); Biltong Boys Swellendam (18:30)
- Donderdag 19 Desember: Robertson.
- Vrydag 20 Desember: Struisbaai.
‘Ons bring jou die nuutste Tuinroete, Hessequa, Karoo nuus’
