Nuwe inisiatief om selfoondiewe te vang

Die bevelvoerder van die Da Gamaskop polisie cluster, Brig Gerard Jantjies vra ouers om hul kinders te waarsku om nie só op hul selfone ingestel te wees dat hulle sagte teikens vir misdadigheid word nie.

MOSSELBAAI NUUS - Die bevelvoerder van die Da Gamaskop polisie cluster, Brig Gerard Jantjies, het vandeesweek 'n nuwe inisiatief geloods om selfoondiefstal te ontmoedig.
 
Hy het opdrag gegee dat elke polisiestasie in die groter Mosselbaai-area voortaan die slagoffers van selfoondiefstal of van ander elektroniese apparaat wat van 'n SIM-kaart afhanklik is, sal bystaan om te verseker dat hul handstuk en SIMkaart behoorlik deur die relevante verskaffer op 'n swartlys geplaas word sodat dit van geen waarde op die sluikhandelmark sal wees nie.
 
"Selfone word maklik geroof en selfone verhandel baie maklik. Deesdae hoor 'n mens nie meer dat iemand se horlosie of juwele gesteel word nie, maar daagliks word selfoondiefstal of selfs -roof baie gereeld by polisiestasies in die groter Mosselbaai-area aangemeld," aldus Brig Jantjies.
 
"Die misdaadslagoffers sal voortaan by die onderskeie polisiestasies se dienssentrums gehelp word om die relevante diensverskaffer te kontak en onmiddellik die selfoon of rekenaartablet te swartlys. 'n Slagoffer wat reeds deur gebeure getraumatiseer is, moet so goed moontlik bygestaan word om seker te maak die hardeware word onbruikbaar gemaak sodat daar nie verder 'n mark daarvoor is nie."
 
Die brigadier maan selfooneienaars om hul instrument se unieke IMEI-nommer altyd veilig te bewaar sodat dit gebruik kan word om dit te swartlys. Handstukke wat geswartlys is, word nutteloos.
 
Lees meer hieroor in Vrydag se Mossel Bay Advertiser, asook aanlyn.
 
'Ons bring jou die nuutste Mosselbaai, Tuinroete nuus' 


Your Comments

Copyright 2017 Group Editors Co PTY Ltd t/a Mossel Bay Advertiser