Uitsonderlike diens by munisipaliteit geloof

Die direkteur: gemeenskapsdienste van die Mosselbaai munisipaliteit, mev Elize Nel (links), saam met die beamptes wat verantwoordelik is vir die lisensiekantoor.

MOSSELBAAI NUUS - Een beampte verbonde aan die Mosselbaai-munisipaliteit se uitsonderlike dienslewering het so wyd kommentaar op sosiale media ontlok dat geen geld aan die positiewe bemarkingswaarde daarvan gekoppel kan word nie.
 
Esther Jordaan het op facebook rapporteer dat sy en haar man onlangs hul voertuigregistrasies by die Mosselbaai-munisipaliteit se lisensie-afdeling moes gaan uitsorteer,
 
"Al drie keer was ons binne 15 minute gehelp en is verduidelik presies wat benodig word. Ek weet nie wat die dame se voornaam is nie, maar haar van is Johnson (Jansen) - sy is 'n absolute ster en het ons gehelp om deur al die prosesse te seil sonder enige haakplekke. Mosselbaai, julle is die enigste munisipaliteit waar ons nog ooit in ons lewe sulke uitstekende diens en vriendelikheid ontvang het. Al die personeel is uiters vriendelik en behulpsaam."
 
Jordaan het gevra dat haar kommentaar op die Mossel Bay Advertiser se facebookblad geplaas moes word, en binne dae is haar opmerking deur meer as 15 000 mense gelees.
 
Juanita Jansen, die betrokke beampte, sê beskeie sy kan nie die Jordaans spesifiek onthou nie. "Dis maar hoe ons al die lede van die publiek hanteer."
 
Die direkteur van gemeenskapsdienste, mev Elize Nel, het die beamptes van die lisensie-afdeling bedank vir die flinke wyse waarop hulle die publiek van hulp is, en bygevoeg dat goeie dienslewering die norm is. "Baie dankie dat julle deur goeie dienslewering die munisipaliteit, en spesifiek hierdie afdeling, se naam hoog hou."
 
 
Die direkteur: gemeenskapsdienste van die Mosselbaai munisipaliteit, mev Elize Nel (links), saam met die beamptes wat verantwoordelik is vir die lisensiekantoor. Langs mev Nel is Juanita Jansen, die toesighouer wie se goeie dienslewering deur 'n leser lof toegeswaai is. Die res van die personeel wat vir hul uitsonderlike diens geloof word, is Whitney Steenberg, Dudley October, Bryoné James, Clive Hartzenberg, Lucinda Desha en Rodney Volkwyn. Foto: Nickey le Roux.
 
'Ons bring jou die nuutste Mosselbaai, Tuinroete nuus'


Your Comments

Copyright 2017 Group Editors Co PTY Ltd t/a Mossel Bay Advertiser