MOSSELBAAI NUUS - Adriaanserylaan, in Asla Park is 'n straat wat elke dag van die jaar wemel van mense. Die 'Sakman', wat ook in die gemeenskap bekend staan as die 'Kruieman' is daagliks op die sypaadjie van dié straat te sien.
Die 24-jarige Andrew Paul Levendal, sê prontuit: "Ek is 'n Rastafarian. Ek is naby aan God." Andrew verkoop daagliks natuurlike produkte wat volgens hom, vir die meeste kwale en skete help.
Op die sypaadjie is sy produkte, wat hoofsaaklik uit bossies kruie en verskillende tipes wortels bestaan, netjies langs mekaar uitgepak.
Daar is onder meer kankerbossie, rooiwortel, bosskilpad, bergknoffel en nog vele ander tipe kruie en wortels.
"Ek sonder myself af van die res van die wêreld. Mense noem ons ook bossiedokters," vertel Andrew, wat die afgelope 16 jaar Rastafarianisme beoefen.
Volgens Andrew kry hy gereeld aanmerkings oor die sakmateriaal wat hy om sy lyf dra waarna hy meer oor sy produkte vertel: "Bosskilpad word gebruik vir geluk.
Jy kan dit in jou tuin sit of verskillende mengsels van die kruie en wortels maak en jouself daarmee was of 'n bietjie daarvan in jou huis rook. Rooiwortel is weer baie goed vir jou niere terwyl die bergknoffel 'n natuurlik antibiotikum is."
Andrew sê besigheid is die afgelope tyd stil, maar voeg by dat verskillende nasies sy produkte aankoop. "Dis meestal Xhosa-sprekendes en kleurlinge wat by my kruie koop. My kliënte is mense wat in tradisionele medisyne glo.
Witmense koop veral die knoffel en boegoe-produkte." Terwyl Andrew oor die produkte praat, wys hy die Advertiser ook die Hotnotskooiproduk. Dié word gebruik om 'vuilgoed' weg te hou en jy kan glo ook spoke in jou huis daarmee verwilder.
Die produkte word in die Kaap en Oos-Londen gekry waarna dit in Mosselbaai verkoop word.
"Ek is gelukkig met my lewenstyl en geniet dit om 'n Rastafarian in Mosselbaai te wees."
Andrew wys aan die Advertiser die verskillende tipe produkte wat hy verkoop. Foto: Louise Karsten
Wat is Rastafarianisme?
Sommige Rastafariese groepe onderskryf Ethiopianisme, wat onder meer daarop aanspraak dat Ethiopië deel was van die Bybelse Tuin van Eden en dat Ethiopiërs buite Afrika die "verlore stamme van Israel is".
Hulle glo dat die rivier Gihon, een van vier riviere wat uit die Tuin van Eden kom, deur Ethiopië vloei en dat dit 'n bewys is dat Ethiopië deel was van die Bybelse Eden. Volgens hulle het die hele vasteland van Afrika eens as Ethiopië bekend gestaan.
Marcus Garvey
In die 1920 het Marcus Garvey, 'n Jamaikaan van geboorte en stigter van die Universal Negro Improvement Association (UNIA), wêreldwyd aandag getrek met sy "terug na Afrika"-beweging vir swartmense. Garvey het swartmense aangemoedig om trots te wees op wie hulle is en selfstandig te raak van blanke heerskappy. Die ontstaan van die swartbewussynsbeweging en burgerlike versetbeweging in die VSA was direkte uitvloeisels van Garvey se werk. Tydens 'n toespraak het Garvey verklaar: "Kyk na Afrika, waar 'n swart koning gekroon sal word; Hy sal die Verlosser wees" .
Enkele jare daarna, op 2 November 1930, is ras Tafari Makonnen gekroon as ko-ning van Ethiopië. Hy het homself die titel gegee van "Keiser Haile Selassie (Krag van die Drie-Eenheid) I, Verowerende Leeu uit die Stam van Juda, Uitverkorene van God en Koning van die Konings van Ethiopië". Selassie se kroning is onmiddellik beskou as die vervulling van Garvey se voorspelling oor die swart koning en kan in 'n sekere sin gesien word as die amptelike begin van die Rastafariese geloof.
Klassieke periode
In die tydperk tussen 1930 en die vroeë 1960's, bekend as die "klassieke periode", was die Rastafarianisme 'n Jamaikaanse godsdienstige beweging met min invloed van of na buite. Soos vandag steeds die geval is, het baie Rastafariërs buite die stede in kampies in die natuur gewoon onder gesag van 'n ouderling of "oudste".
Sommige kampe is soortgelyk aan kloosters, met mans en vroue wat apart woon. Ander is in voorkoms en organisasie weer soortgelyk aan statjies in Wes-Afrika. Die lewe in die statjies is eenvoudig, met ital-kos wat deur die vroue voorberei word, en die rituele rook van ganja om die regte geestelike bewussynsvlak te bereik. Aanvanklik is die Rastafariër-lokke net deur diegene gedra wat die Nasireër-gelofte (Numeri 6: 2 - 8) afgelê het, maar dit het later gewild geword onder ander Rastafariërs ook.
Rastafarianisme vandag
Die meeste Rastafariërs is vandag nie baie gesteld op die fyner besonderhede van die leerstellings van hul geloof nie. Hulle glo in die basiese leerstellings van die Rastafarianisme, maar behoort nie noodwendig tot 'n besonderse, georganiseerde groep of orde nie.
Daar is na raming tans tussen 200 000 en 700 000 Rastafariërs wêreldwyd. Omdat Rastafariërs nie amptelike kerkgeboue of tempels het nie, daar nie 'n amptelike Rastafariër-publikasie of 'n amptelike organisasiestruktuur is nie, is dit moeilik om presies vas te stel hoe akkuraat hierdie syfer is. Die land met die grootste aantal Rastafariërs is Jamaika, waar sowat 100 000 van die ongeveer drie miljoen mense die Rastafariese geloof amptelik beoefen.
Vir die meeste Rastafariërs is die aanvanklik sterk politieke ideale van hul geloof, insluitend die terugkeer van die swartmense na Ethiopië, vandag nie meer so belangrik nie. Hulle vind eerder aanklank by die alternatiewe, "natuurlike" leefwyse waar gesondheidskos, reggae-musiek en ganja sorg vir 'n eiesoortige "hemel op aarde".
Bron: Wikipedia
ARTIKEL EN FOTO'S: LOUISE KARSTEN, MOSSEL BAY ADVERTISER-JOERNALIS
'Ons bring jou die nuutste Mosselbaai, Tuinroete nuus'
