Ongeluk eis jong vrou se lewe

Letisha se rooi motorfiets is duidelik te sien onder die wrak van die beskuldigde se voertuig.

MOSSELBAAI NUUS - Die jong vrou wat verlede Woensdagaand, 10 Oktober naby die Langeberg Winkelsentrum verongeluk het, sou binnekort haar eksamen vir assistent apteker voltooi het.

Die 24-jarige Letisha du Toit, was 'n bekende gesig by die Moskem Apteek in Hartenbos waar sy gewerk het en het glo groot drome gehad om eendag 'n apteker te word.

Letisha het vroeër die aand by haar broer in Klein-Brakrivier gekuier en na 21:00 teruggekeer huistoe. Sy het met haar motorfiets op die N2 in die rigting van Mosselbaai gery en die afrit by die Langeberg Mall geneem toe sy in 'n botsing met 'n aankomende voertuig betrokke was.

Dié voertuig het teen die verkeer in die eenrigting gery.

Die bestuurder van die voertuig, 'n 55-jarige werknemer van PetroSA, was met die SAPD se aankoms op die ongelukstoneel, nie op die toneel nie. Hy is na 'n soektog in naby geleë bosse gevind en gearresteer.

Die beskuldigde, wat in Heiderand, Mosselbaai woonagtig is, het op 12 Oktober in die Mosselbaai Landdroshof verskyn op aanklag van strafbare manslag en die bestuur van 'n motorvoertuig terwyl onder die invloed van alkohol.

Hy is met 'n waarskuwing vrygelaat en verskyn weer op 21 Januarie 2013 in die hof.


Letisha was lief vir haar werk as apteker assistent en wou graag 'n apteker word.

ARTIKEL: LOUISE KARSTEN, MOSSEL BAY ADVERTISER-JOERNALIS


Show comments

Copyright 2017 Group Editors Co PTY Ltd t/a Mossel Bay Advertiser