Dierekliniek spog met spoedvrate

Links is 'n karet (loggerhead) skilpad en regs is die leerrug (leatherback). Selfs op hierdie jong ouderdom kan die verskil in grootte reeds duidelik gesien word.

HARTENBOS NUUS - Die Hartenbos-dierekliniek van dr Frans de Graaff is welbekend aan plaaslike inwoners vir die verskeidenheid van wilde diere wat hier versorg en suksesvol gerehabiliteer word.
 
Op die oomblik is daar, onder andere, twee baie besondere en spesiale gaste. 'n Swerfvalk (Falco peregrinus) oftewel peregrine falcon is onlangs met 'n vlerkbesering na die kliniek gebring en is besig om besonder goed te herstel.
 
Swerfvalke kan maklik 320km/uur bereik wanneer hulle afduik na hulle prooi, wat hoofsaaklik mediumgrootte voëls en klein soogdiere insluit. Volwasse swerfvalke se vlerkspan is 74 – 120cm met 'n ligaamslengte van 34 – 58cm.
 
Die ander besondere spesie is die leerrugskilpad (Dermochelys coriacea) of beter bekend as leatherback. Beslis baie vinniger as hulle familie op land, kan die leerrugskilpaaie 35.28km per uur swem wat hullle die derde vinnigste reptiel maak.
 
Hulle is ook die grootste van die seeskilpaaie en kan tot 700 kilogram weeg en verder is hulle die marinediere wat die diepste kan duik. Rekords van dieptes meer as 1 280 meter is al aangeteken.
 
Dié skilpad het op een van ons plaaslike strande uitgespoel en sal binnekort saam met die karetskilpaaie na die Two Oceans-akwarium in Kaapstad of Bayworld in Port Elizabeth geneem word vanwaar dit later vrygelaat sal word.
 
Die publiek word versoek om op die uitkyk te wees vir seeskilpaaie wat op strande uitspoel. Indien hulle teëgekom word, moet hulle nie in die water terugplaas word nie, maar op 'n klam doek in 'n houer gehou word en so spoedig moontlik na of dr De Graaff se kliniek of na die Dias Museum geneem word. SMART (Stranded Marine Animal Rescue Team) kan ook gekontak word (072 227 4715/ 076 780 7832).
 
 
Dr Frans de Graaff hou die leerrugskilpadjie vas wat onlangs op 'n plaaslike strand uitgespoel het.  
 
'Ons bring jou die nuutste Hartenbos, Tuinroete nuus' 


Your Comments

Copyright 2017 Group Editors Co PTY Ltd t/a Mossel Bay Advertiser